ತುಳುತ ಸುರುತ ಸಿನಿಮೊಗು ಸುರುತ ಪದ ಬರೆತಿನ ಬಿ ಭೋಜ ಸುವರ್ಣ ಮೇರ್ ಐಲೇಸಾದ ವಯೋಸಮ್ಮಾನ ಪುರಸ್ಕಾರೊಗು ಆಯ್ಕೆ . ---------------------------------------------

ತುಳುತ  ಸುರುತ ಸಿನಿಮೊಗು  ಸುರುತ ಪದ ಬರೆತಿನ  ಬಿ ಭೋಜ ಸುವರ್ಣ ಮೇರ್   ಐಲೇಸಾದ  ವಯೋಸಮ್ಮಾನ ಪುರಸ್ಕಾರೊಗು ಆಯ್ಕೆ . 

---------------------------------------------

ತುಳುತ ಸುರುತ ಸಿನಿಮಾ   ''ಎನ್ನ ತಂಗಡಿಗ್''  ಸುರುತ ಪದ ಬರೆತಿನ  85  ವರ್ಷ ಪ್ರಾಯೊದ  ಬೊಕ್ಕ ಪಟ್ಣದ  ಭೋಜ ಸುವರ್ಣ ಬರ್ಕೆ ಮೆರೆಗ್  ಜೀವಮಾನದ  ಸಾಹಿತ್ಯ- ರಂಗಭೂಮಿ  ಸಾಧನೆಗಾದ್  ಐಲೇಸಾ -ದಿ  ವಾಯ್ಸ್ ಆಫ್ ಓಷನ್ (ರಿ ) ಸಂಸ್ಥೆ  ವಯೋಸಮ್ಮಾನ  ಪುರಸ್ಕಾರೊಗು  ಆಯ್ಕೆ ಮಲ್ದೆರ್ . 

 ಸಾಹಿತ್ಯ ಸಂಗೀತ  ಕ್ಷೇತ್ರೊಡು   ಬೋಡಾಯಿನಾತ್   ಬೇಲೆ  ಮಲ್ತುದ್ಲಾ ಸರಕಾರ , ಚಿತ್ರರಂಗ , ರಂಗ ಭೂಮಿ  ಸಂಘ ಸಂಸ್ಥೆಲೆಡ್  ಸಾಧನೆಗ್ ಸರಿಯಾದ್  ಪುರಸ್ಕಾರ ಪಡೆವಂದಿನಕಲೆನ್ ನಾಡುದ್  ಐಲೇಸಾ  ಈ ಪುರಸ್ಕಾರ  ಕೊರೊಂದು ಬರೊಂದುಂಡು .  

ಈ ದುಂಬು  ಕರ್ನಾಟಕ  ಸರಕಾರೊಡು ರಾಜ್ಯೋತ್ಸವ ಪ್ರಶಸ್ತಿ   ತಿಕ್ಕಂದಿನ  ಸುಳ್ಯದ  ಸುಬ್ರಾಯ ಚೊಕ್ಕಾಡಿ  , ಮುಂಬೈದ  ಶಿಮುಂಜೆ ಪರಾರಿ  ಇಂಚಿನ ಮಹಾನ್   ಸಾಹಿತಿಲೆಗ್  ಐಲೇಸಾ  ವಯೋಸಮ್ಮಾನ  ಪುರಸ್ಕಾರ ಕೊರ್ದು  ಗೌರವ ಮಲ್ದುಂಡು.  ಈ ಸಾರಿ   ಭೋಜ ಸುವರ್ಣೆರೆನ್ ತುಳು ಅಕಾಡಮಿ  ಒಂಜಿ ಬುಡುದು   ಸರಕಾರದ ಬೇತೆ ಒವ್ವೆ   ಪಣವುದ ಸಹಕಾರ , ಪುರಸ್ಕಾರ  ತಿಕ್ಕಂದಿನವೆಡಾವ್ರ , ಅಂಚನೆ  ಸಾಧನೆ ಮಲ್ದಿನ  ಭೋಜ ಸುವರ್ಣೆರೆಗ್  85  ವರ್ಷ ಪ್ರಾಯ  ಆಯಿನೈಟಾವ್ರ , ಈ ಆಯ್ಕೆನ್  ಸಂಸ್ಥೆದಕುಲು  ಸರ್ವಾನುಮತೊಟು  ಮಲ್ದೆರ್ . 

ವಯೋಸಮ್ಮಾನ  ಪುರಸ್ಕಾರ  ಸಾಧಕನ  ಪ್ರಾಯಾದಾತ್  ಪಂಡ 85,000 ರೂಪಾಯಿ ಪಣವುದ ಸಹಕಾರ  ಬೊಕ್ಕ  ಅರೆನ  ಇಷ್ಟದ ಸಾಹಿತ್ಯ ಸಂಗೀತ  ಉಡಿಗಿರೆದ  ಜೊತೆಟ್   ಸರಳ ಸಮಾರಂಭದೊಟ್ಟುಗು  ನಡಪುಂಡು .  ಸಭೆಟ್  ಭೋಜ ಸುವರ್ಣ ಮೆರೆನ  ಸಾಹಿತ್ಯ , ಸಂಗೀತ , ನಾಟಕ ,ಕಷ್ಟ ಸುಖತ,  ಸಾಧನೆದ  ಚರ್ಚೆ ನಡಪೆರೆ ಉಂಡು . 

 ಕಾರ್ಯಕ್ರಮ  ತಾರೀಖ್  21, ಡಿಸೇಂಬರ್ 2024 ದಾನಿ  ಪಾಂಡೇಶ್ವರದ  ನಾಸಿಕ್ ಬಿ ಹೆಚ್  ಬಂಗೇರ  ಸಭಾಭವನ , ಪೊಲೀಸ್ ಲೇನ್  ಮಂಗಳೂರು  ಮುಲ್ಪ  ಮಧ್ಯಾಹ್ನ  3:00  ಗಂಟೆಡ್ದು ಸುರುವಾದ್  ಬೈಯ್ಯ 7:00 ಗಂಟೆ ಮುಟ್ಟ  ನಡಪುಂಡು. ಭೋಜ ಸುವರ್ಣ ರೆಗ್  ಸಂಗೀತ , ಭಜನೆ  ಬಾರಿ ಇಷ್ಟ , ಅಂಚಾದ್ ಕಾರ್ಯಕ್ರಮೊಟು  ಆರೇ ಬರೇತಿನ  ದುಂಬುದ ಸಿನಿಮಾ ಪದ , ಭಜನೆ  ಅಂಚನೆ ಐಲೇಸಾದ  ಪೊಸ ಪದೊಕುಲೆನ್   ಪುಗರ್ತೆದ  ಗಾಯಕೆ ರಮೇಶ್ಚಂದ್ರ   ಮುತಾಲಿಕೆಡ್  ಐಲೇಸಾದ  ಗಾಯಕೆರ್ ಪನೆರೆ  ಉಲ್ಲೆರ್.  

ಕಾರ್ಯಕ್ರಮತ  ಮುಖ್ಯ ಬಿನ್ನೆರಾದ್  ಅಬು ದಾಭಿದ ಸರ್ವೋತ್ತಮ ಶೆಟ್ರು , ಕತಾರ್  ರವಿ ಶೆಟ್ರು , ಸೌದಿ ಅರೇಬಿಯಾದ  ನರೇಂದ್ರ ಶೆಟ್ರು ,  ಸಂಗೀತ ನಿರ್ದೇಶಕೆ  ಚರಣ್ ದಾಸ್  ಮಲ್ಯ , ಸರೋಜಿನಿ ಶೆಟ್ಟಿ  ಪಾಲು ಪಡೆವೆರೆ ಉಲ್ಲೆರ್.  

ಭೋಜ ಸುವರ್ಣ  ಮೆರೆನ ಅಭಿಮಾನಿಲು  ಮಾತೆರ್ಲಾ ಬತ್ತುದು  ಈ ಮಲ್ಲ ಸಾಧಕನ  ವಯೋಸಮ್ಮಾನ ಮಾನಾದಿಗೆಡ್  ಪಾಲು ಪಡೆವೊಡು ಪಂಡುದ್  ಐಲೇಸಾದ  ಮಾಧ್ಯಮ ಸಂಚಾಲಕೆರಾಯಿನ  ಸೂರಿ ಮಾರ್ನಾಡ್ ತೆರಿಪಾದೆರ್. 

(Box item)

 ಬಿ. ಭೋಜ ಸುವರ್ಣ    ತುಳು ಭಾಷೆಡ್  ಇನಿಮುಟ್ಟ  ಮೂಜಿ ಸಾವಿರದಾತ್  ಪದ ಬರೆತ್ತೆರ್ . ಇರ್ವತ್ನಾಲ್  ನಾಟಕ ಬರೆದ್  , ನಿರ್ದೇಶನ  , ಅಭಿನಯ ಮಲ್ತು  ಗೊಬ್ಬುದೆರ್ . ಭೋಜ ಸುವರ್ಣೆರ್  ಬರೆತಿನ  ಇಂಪು ತಂಪು ಜಾಗೆ ಉಂದು  ಸ್ವರ್ಗಯಾ , ರಾಧಾ ರಾಧಾ ಒಡೆ  ಪೋಪಾ  ಎನನ್  ಬುಡ್ದು ಸೀದಾ, ಡಾರಿ  ಡೀರಿ  ಡೆನ್ನಾ , ಇರೆ ಪ್ರೀತಿದಾ  ದಿನ ಕಾತೆ , ಕಣ್ಣ್ ಇತ್ತುದ್  ಕೈಯ್ ಇತ್ತುದು  ಕಲ್ಲಾಯನ . ರಾಜ ರಾಜ  ಮಹಾರಾಜ  , ಈ ಜಗತೇ  ಜಗದೀಶನ  ಪದೊಕುಲು ಇನಿಕ್ಲಾ  ತುಳುನಾಡುಡ್  ಪುದರಾಯಿನ . ಮೆರೆನ ಪೊಸ ಜೀವನ  ನಾಟಕ  ಅಪಗಾದ ಕಾಲೊಡು  ಬಾರಿ ಪುಗಾರ್ತೆನ್ ಪಡೆಂಡ್ . ಎಡ್ಮನೇ ಮುಟ್ಟ  ಕಲ್ತಿನ ಭೋಜ ಸುವರ್ಣ   ಬಡಪತ್ ದ  ಕಾರಣೊಗು  ಗ್ಯಾರೇಜ್ ಬೇಲೆಗ್ ಸೇರ್ ದ್ , ಬೊಕ್ಕ ಒಂತೆ  ಸಮಯ ಬೊಂಬಾಯಿದ ಕೋಕಾಕೋಲಾ ಫ್ಯಾಕ್ಟರಿಡ್  ಬೇಲೆ  ಮಲ್ತೆರ್ . ನಾಟಕದ ಗಿರ  ಅರೆನ್ ಪಿರ ಊರುಗು ತರ್ಪಾದ್  ಮಂಗಳೂರು ಫಿಷರೀಷ್  ಕಂಪೆನಿಡ್ ಬೇಲೆ   ಮಲ್ತೊಂದು ನಾಟಕ ಸಿನಿಮಾದ  ಅಭಿನಯ  ಮಲ್ಪುಲೆಕ್ಕ  ಮಲ್ತುಂಡ್.